Xeer Ilaaliyaha Guud ee Kenya Githu Muigai oo qoraal uu soo saaray lagu daabacay Wargeyska Dailynation ee kasoo baxa dalka Kenya ayaa sheegay in mowqifka Kenya ay ka taagan tahay muranka badda ee kala dhaxeeya Soomaaliya uu yahay wada-hadal.
Waxa uu Sheegay in Dowladda Kenya ay dhowr jeer kala hadashay Dowladda federaalka Soomaliya in arinta wada-hadal lagu dhameeyo, balse arintaas lagu guuldareystay.
“Meesha aan dacwadda ka taaganahay waxay ku qorantahay Sharciga Badaha ee QM iyo Go’aano kale oo Madaxda Wadamadda Midowga Africa ay qaateen 1964tii”ayuu yiri Githu Muigai .
Bilowga sanadkaan cusub ee 2018-ka ayaa lagu filayaa in Maxkamadda Cadaaladda Adduunka ee Hague ee dalka holland inay soo saarto qaabka looga hadlayo dacwada badda u dhaxeysa Soomaliya iyo kenya.
Muranka u dhaxeeya Dowladaha Soomaliya iyo Kenya dhanka badda ayaa waxaa uu ahaa mid soo socday saddexdii sanno ee u dambeysay, iyadoo horaantii sanadkan 2017-ka ay Maxkamadda Hague ee dalka Holland ay xukmisay in kiiskan ay maxkamadda qaadi karto.