Guddoonka Baarlamaanka maamulka Hir-shabeelle ayaa soo dhaweeyay go’aankii kasoo baxay dowladda Soomaliya ee lagu ayiday xil ka qaadistii Madaxweynihii Maamulkaas Cali C/laahi osoble.
Guddoomiyaha Baarlamaanka Maamulka Hirshabeelle Sheekh Cusmaan Barre oo warbaahinta la hadlay ayaa soo dhoweeyay go’aankii dowladda ku taageertay xil ka qaadistii Cosoble,waxaa uu sheegay inay soo dhoweynayaan go’aanka Golaha Wasiirada ay ku gaareen inay ku raacaan sharciyada kalsooni kala noqoshada Baarlamaanka Hirshabeelle.
Waxa uu sheegay In haatan wixii ka dambeeya Baarlamanka maamulka Hir-shabeelle uu guda gali doono sidii loo dhisi lahaa guddi ka shaqeeya qaban-qaabada doorashada madaxweynaha cusub ee Maamulka Hir-shabeelle.
“Aad iyo aad ayaa uga faraxsanahay go’aankaas, waa uga mahad celineynaa dowladda Federaalka inay raacdo sharciyada kalsooni kala noqoshada Baarlamaanka Hirshabeelle ay xilka uga qaadeen madaxweynihii hore ee Hir-shabeelle Cali Osoble”,ayuu yiri Guddoomiyaha Baarlamaanka Hirshabeelle
Shalay kulan ay Magaladda Muqdisho ku yeesheen Golaha Wasiirada Xukuumadda Soomaliya ayay ku ayideen go’aankii xil ka qaadista Madaxweynihii hore ee Hirshabeelle Cali C/llaahi Cosoble, kaddib markii warbixin laga dhageystay Wafdi Wasiiro ahaa oo safar xaqiiq raadin ku tagay todobaadkii hore magaalada Jowhar.