Qoraal kasoo baxay Madaxtooyada Soomaliya aya si kulul loogu hadlay hadal shalay magaalada Kismaayo Caasimada KMG ee jubba-land uu ka sheegay Raisulwasaaraha Xukuumadda federaalka Soomaliya Mudane Cumar C/rashiid Cali Sharmarke oo ahaa in dalka uu u baahan yahay is bedel dhinaca hoggaanka ah.
Agaasimaha Warfaafinta ee Madaxtooyada Shador Xaaji Maxamuud ayaa qoraal uu soo saaray waxaa uu ku tilmaamay hadalkaas mid aan loo baahneyn oo ka fog anshaxa doorashooyinka isla markaasna uu ka leeyahay dano gaar ah.
“Waxaa wanaagsan inuu Raisul Wasaare Cumar Cabdirashid Cali Sharmarke, ilaaliyo anshaxa doorashooyinka iyo mas’uuliyadda wali uu u hayo dalka ee Ra”iisul Wasaarenimo, ma wanaagsana in uu ololaha doorashadiisa shaqsiydeeyo”ayuu yiri Agaasimaha Warfaafinta Madaxtooyada Shador Xaaji Maxamuud
Agaasimaha Warfaafinta Madaxtooyada oo sii hadlayay ayaa yiri “Madaxweyne Xasan Sheekh , wuxuu mudan yahay in lagu aammaano difaacida dananaha dalka iyo dadka Soomaaliyeed iyo diidmada faragelinta tooska ah ee shisheeyaha, Madaxweynu mar walba waa ka go’an tahay illaalinta xaduudaha dalka ee dhanka badda Iyo bariga” ayuu yiri Agaasimaha Warfaafinta Madaxtooyada.
Arintaan ayaa muujinaysa loolanka musharaxnimo ee xiligaan u dhaxeeya Raisulwasaaraha Xukuumadda federaalka Soomaliya Mudane Cumar C/rashiid Cali Sharmarke iyo Madaxweynaha Soomaliya Xasan Shiikh Maxamuud oo mar kale doonaya in uu kusoo laabto kursiga madaxtinimo ee Soomaliya.