Guddiga doorashada maamulka Hir-shabeelle oo warbaahinta kula hadlay Magaalada Jowhar Caasimada Maamulkaas ayaa sheegay in dib loo dhigay doorashada xubnaha aqalka hoose ee Baarlamaanka federaalka Soomaliya ilaa maalinta arbacada ah kadib israsaaseentii dhawaan ka dhacday Magaaladaas.
Gudiga doorashada maamulka Hirshabeelle ayaa sidoo kale sheegay iney ku howlanayeen xalinta gacan ka hadalkii dhawaan ka dhacay magaalada Jowhar ee Caasimada Maamulka Hir-shabeelle, laakiin ma aysan sheegin sida laga yeeli doono musharixiintii dartood loogu dagaalamay magaalada Jowhar.
Dhawaan Wasiirka Dhalinyarada iyo Isboortiga Maxamed Xasan Nuux oo kamid ahaa musharixiinta xubnaha aqalka Hoose ayaa markii uu xaqiiqsaday in looga adkaanayo hadii uu tartamo wareega labaad waxaa uu kiciyay buuq, isagoo ka baxay hoolka shirka, islamarkaana dad taageersan ay damiyeen korontada howlka shirka jowhar, waxaana kadib bilowday buuq iyo gacan ka hadal dhex maray ergada labada dhinac taageersaneyd.
Dhanka kale warar lagu kalsoonaan karo ay halayso idaacadda Simba ee Magaalada Muqdisho ayaa ku waramaya In Ciidamo ka Tirsan kuwa Midowga Afrika Amisom in lagu wareejin doono xarunta shirka Magaalada Jowhar si ay kaga hortagaan in la carqaladeeyo doorashada aqalka hoose.

