Beeraleyda qaadka dalka Kenya ayaa ka codsaday Federaalka Dowlada Soomaliya in ay ka laabato Go’aanka ay ku hakisay qaadkii la keeni karay Soomaliya.
Mudane Peter Munya oo ah Gudoomiyaha Gobolka Meru ee dalka Kenya oo ah halka uu ka baxo qaadka Kenya ka yimaada ee Soomaaliya la keeno oo la Hadlay warbaahinta Kenya ka howlgasha ayaa sheegay in uu ahaa go’aan lagu deg degay in la joojiyo qaadka.
Waxaa uu dowlada Federaalka Soomaaliya ka codsaday Peter Munya oo ah Gudoomiyaha Gobolka Meru in ay ka laabato go’aanka ay ku hakisay diyaaradaha qaadka Soomaaliya keena waxa uuna intaas hadalkiisa ku daray in saameynta dhaqaale ee arrintaan yeelan karto laga dareemi doono Soomaaliya iyo Kenya.
Wasiirka Gaadiidka iyo Duulista Hawada ee Xukuumadda Soomaaliya Mudane Cali Axmed Jaamac Jangali ayaa Shalay sheegay in dhammaan duulimaadyada qaadka ee ka imaan jirey dalka kenya In si kumeel gaar ah loo joojiyay.
Balse Magaalooyinka Qardho iyo Gaalkacyo oo ka tirsan deeganada Maamulka Puntland waxaa barqanimadii maanta ka dagtay Diyaarad siday qaad oo ka timid dhanka dalka Kenya, puntland ayaa si cad u sheegtay in uusan quseenin Go’aanka Dowladda Soomaliya.

