Madaxweyne ku xigeenka Puntland, C/xakiim C/llaahi Xaaji Cumar Camay, iyo Mas’uuliyiin ka Tirsan Maamulkaas ayaa maanta kormeero ku tagay goobihii shalay lagu weeraray qaraxyada ee Magaalada Gaalkacyo ee Gobolka Mudug.
Mas’uuliyiinta kormeerka ku wehlinaayay Madaxweyne ku xigeenka Puntland waxaa kamid ahaa wasiirada Waxbarshada,Caafimaadka,Howlaha Guud,, Xildhibaano Maamulka Gobalka Mudug iyo Maamulka degmada Gaalkacyo.
Xarumaha ay kormeereen Mas’uuliyiinta Puntland waxaa ka mid ahaa, dhismaha dowladda hoose,Suuqyada Xero Dayax , Isbitaalada GMC, Guryosamo iyo Isbitaalka guud oo lagu dabiibayo dadkii ku dhaawacmay qaraxyadii ka dhacay Gaalkacyo.
Ugu Horeyntii Madaxweyne ku xigeenka Puntland, C/xakiim C/llaahi Xaaji Cumar Camay ayaa sheegay in weerada ay gaysteen rag, kasoo horjeeda hormarka maamulka Puntland islamarkaana ay jawaab culus ka bixin doonaan.
Dhanaka kale Wasiirka Caafimaadka Puntland, C/naasir Cismaan Cuuke ayaa sheegay in dhaawacyadu ay u badan yihiin dad shacab ah, waxaana uu tilmaamay in kuwa halista ah loo qaadi doono dalka dibadiisa, si loo soo dabiibo.
