Ururka Daacish oo dhawaan ku dhawaaqay in Saldhigyo uu ka sameyntay Gudaha dalka Soomaliya ayaa haatan la aaminsan yahay in uu ururka halayo Taageero Maaliyadeed iyo mid malatari oo kaga imaanaysa dhinacyada islaamiyiinta.
Agaasimihii hore ee Sirdoonka Maamulka Puntland Abdi Hassan Hussein, oo la hadlay laanta Afka Ingiriiska ee Voa-da ayaa ka digay khatarta ka imaan karta in ururka Daacish uu ku fido qeybo kamid ah Gobolada dalka Soomaliya.
Waxa uu sheegay Abdi Hassan Hussein in daacish ay markii hore ku bilowdeen Soomaliya Ciidan ahaan 25-30-askari balse ay dib u haleen Taageero kaga timid Dagaalyahano ka tirsan Xarakada Al-shabaab oo dhawaan ku dhawaaqay in ay ku biireen Daacish-ta Soomaliya.
“Waxa ay halayaan Taageero Dhaqaalo iyo mid Ciidan oo kaga imaanaysa dalka Yemen waxa ay sidoo kale halayaan Dharka Ciidamada iyo Tababaro ay siinayaan Islamayiin kale oo ka Dagaalama dalka Yemen ayuu yiri Agaasimihii hore ee Sirdoonka Maamulka Puntland.
Arintaan ayaa kusoo beegmaysa xili Kooxda Daacish ay dhawaan shaacisay in weerarkii ugu horeeyay in ay ka fulisay Soomaliya isla markaana lagu gubay Gaari ay lahaayeen Ciidamada Midowga Africa ee AMISOM.

