Inta la xaqiijiyay 2-qof oo kamid aheyd Ganacsatada Suuqa Degmada Wadajir ayaa dhimatay, qof kalana wuu dhaawacmay markii askari ka tirsan Ciidamada Dowladda Federaalka Soomaliya uu rasaas ku furey Suuqa weyn ee degmadaa gaar ahaan qeybta Bacadlaha.
Warar soo baxaya ayaa sheegaya in askariga rasaasta furey iyo Ganacsatada dhimatay uu soo kala dhexgalay muran ku aadan bixinta lacagta Cashuurta ee laga qaado dadka ku ganacsada Suuqa weyn ee degmada Wadajir.
Muranka kadib waxaa gudaha Suuqa laga maqlay rasaas uu furey askariga waxaa ku dhintay labo qof oo kamid ahaa Ganacsatada sida idaacadda Simba u xaqiijiyay qof kamid ah dadka deegaanka Degmada Wadajir.
Warar kale oo ay halayso idaacadda Simba ayaa ku waramaya in askariga dilka geystay oo goobta isaga baxsaday iyadoo aysan jirin ciidamo ka tirsan kuwa Dowladda Soomaliya oo goobta gaaray sida horey loogu bartay.
Maamulka Degmada Wadajir aynu la xiriirnay waxa ay ka jawaabi waayeen wicitaan ay idaacadda Simba la sameysay.