Wararka ka imaanaya Duleedka Degmada Balcad ee Gobolka Shabeelaha Dhexe ayaa ku waramaya in dagaal xoogan oo u dhaxeeya Ciidamo kawada tirsan kuwa Malatariga Xoogga dalka Soomaliyeed in uu halkaas ka socda.
Dagaalka oo soo bilowday habeenkii xalay ahaa ayaa lagu waramayaa in saakay uu dib kaga qarxay deegaanka xawaadley ee Duleedka Degmada Balcad ee Gobolka Shabeelaha Dhexe, iyadoo deegaanka ay gaareen Ciidamo kale oo ka tirsan kuwa Malatariga Dowladda Soomaliya si ay dagaalka ugu qeyb qaataan.
Taliyaha Ciidamada Xoogga dalka aagga Jiida iyo Xawaadley ee Gobolka Shabeelaha Dhexe Maxamuud Xaaji Axmed (Sheegow) oo la hadlay idaacadda Simba ayaa ku eedeeyay taliyaha Guutada 5-aad ee Xoogga dalka Soomaliyeed in uu dagaal kula jiro taliska 1-aad ee Ciidamada Xoogga ee Gobolka ku sugan.
Inta la xaqiijiyay dagaalka xalay iyo saakay ka socda deegaanka xawaadley ee Duleedka Degmada Balcad ee Gobolka Shabeelaha Dhexe waxaa ku dhintay 7-ruux oo u badan ciidamada wada dagaalamay ee ka tirsan Xoogga dalka Soomaliyeed.