Wararka ka imaanaya Gobolada Sool iyo Sanaag ayaa ku waramaya in ku dhawaad 15-ruux saacadihii ugu dambeeyay ay deeganadaas ugu geeriyoodeen biyo La’aan, xili abaarta ka jirta Goboladaas ay gaartay heerkii ugu sareysay.
Abshir C/casiis Wasiir ku-xigeenka Wasaaradda arrimaha gudaha maamulka Khaatumo State oo la hadlay idaacadda simba ee magaalada Muqdisho ayaa sheegay in saacadihii ugu dambeeyay dad kor u dhaafaya 13-ruux ay u dhinteen haraad iyo gaajo.
“Ilaa 3-meelood oo ka Tirsan Gobolka Sool iyo Sanaag ayaa haatan laga soo sheegayaa in ay saameysay abaarta, ilaa iyo 13-qof ayaa saacadihii ugu dambeeyay haraad iyo gaajo ugu geeriyooday abaarta jirta, abaarta waxa ay gaartay heerkii ugu xumaa mana jirto cid soo gurmatay dadka abaarta ay saameysay”,ayuu yiri Abshir C/casiis.
Gobolada dalka Soomaliya waxaa haatan ka jira abaaro saameeyay dadka iyo duunyada waxaase jirin cid ilaa haatan u gurmaday dadkaas.