Saacidihii aynu soo dhaafnay kumanaan Tahriibayaal ah oo laga soo badbaadiyey badda u dhaxeysa Liibiya iyo Italy ayaa si nabad ah waxa ay ku gaareen Dekedda magaalladda Augusta ee Jesiirdda Sicilia ee dalka Talyaaniga.
Tahriibayaasha ayaa la sheegay in laga soo badbaadiyey Badda Mediterranean Sea, iyagoo ku safray dooni aan ammaan ahayn, maraakiib laga leeyahay dalalka Talyaaniga iyo Spain ayaa la sheegay inay soo daad-gureeyeen Tahriibayaashaasi, iyagoo ugu dambeyntii geeyey Jesiiradda Sicilia.
Hay’adda muhaajiriinta Qaramada Midoobay ayaa todobaadkaan sheegtay in koox muhaajiriin ah oo ay ku jiraan 20 duymar ah iyo 6 caruur ah ay dooni yar ka raaceen xeebaha Libya Arbacadii, balse ay doonidaasi saacaddo kadib badda kula dagtay.
Hay’adda IOM ayaa sidoo kale sheegtay in 4-kun 220 qof ay sannadkan badda Mediterranean-ka ee u dhaxaysa dalalka Talyaaniga iyo Libiya ay ku dhinteen, iyadoo sannadkii horena ay isla baddaasi ku dhinteen 3777 qof.