Gudoomiye-yaashii Degmooyinka Dharkiinley iyo Kaaraan ayaa maanta xilalka isu badalay kadib markii munaasabad ay ka dhacday Xarunta degmada Dharkinley ee Gobolka Banaadir.
Munaasabaddii ay xilalka isugu wareejinayeen, ayaa waxaa ka qaybgalay masuuliyiin kala duwan sida, Taliyaha Ciidanka Booliska Gobolka Banaadir, Bishaar Abshir Geedi, Gudoomiye Ku Xigeenka Dhinaca Siyaasadda & Amniga ee Maamulka Gobolka Banaadir, Maxamed Axmed Diiriye iyo Xildhibaan Xasan Macalin oo ka tirsan Baarlamaanka Somaliya.
Gudoomiyihii Hore ee Degmada Kaaraan, C/fitaax Nuur Cali, ayaa u wareegay Maamulka Degmada Dharkiinley, halka Gudoomiyihii Degmada Dharkiinley, Cumar Mayre Macow uu isna la wareegay Xafiiska Degmada Kaaraan, Kadib wareegto kasoo baxday wasaaradda arrimaha Gudaha Xukuumadda Soomaliya.
Ugu Horeyntii Gudoomiyaha Cusub ee degmada Dharkinley Mudane C/fitaax Nuur Cali ayaa ka codsaday shacabka degmadiisa in ay la shaqeeyaan islamarkana dhankiisa uu ka caawin doono shacabka degmada in ay helaan waxyaabaha ay u baahan yihiin.
Dhanka kale Gudoomiye Ku Xigeenka Dhinaca Siyaasadda & Amniga ee Maamulka Gobolka Banaadir, Maxamed Axmed Diiriye (Yabooh) oo Munaasabada ka qeyb galay ayaa ammaanay sida quruxda badan ee ay xilalka isugu wareejiyeen masuuliyiintaasi.
