Dowladda Ethopia ayaa qaaday talaabo u muuqata mid ka careysiinaysa Dowladda Federaalka Soomaliya kadib markii Maamulka Somali-land ay u aqoonsatay dal Madax Banaan islamarkaana Safaarad gaar ah u dhistay.
Dhismaha cusub ee dowladda Itoobiya siisay Safaaradda Somaliland ee Addis Ababa ayaa ku yaalla Xaafada Bole, waxaa baraha bulshada la soodhigay sawirka dhismaha iyo boor ku qoran afka Englishka”The Republic of Somaliland Permanent Diplomatic Mission Addis Ababa”,(Jamhuuriyadda Somaliland Xafiiska Diblomasiyadda ee Addis Ababa).
Somaliland waxay horay wakiil ugu magacawday dalka Itoobiya, kaasoo degenaa dhisme Ijaar ahaa, balse tallaabada ay Itoobiya ku siisay dhismaha cusub waxay noqon kartaa mid xadgudub ku ah qaranimada Soomaaliya.
Dhanka kale Wasiirka Arrimaha Dibadda Somaliland Sacad Cali Shire oo ka hadlayay saamiga Itoobiya laga siiyay Dekeda Berbera, ayaa ka hadlay halka uu ka imaanayo saamigaas, isagoo tilmaamay in DP world oo lahayd saami ah 65% laga jaray 14%, halka Somaliland oo lahayd 35% laga jaray 5%, sidaasna Itoobiya lagu siinayo 19%, waxase uu sheegay inaanay Itoobiya weli si rasmi ah qayb uga noqon maalgashiga dekedda Berbera.