Wararka ka imaanaya Magaalada Jowhar ee xarunta Gobolka Shabeelaha Dhexe ayaa ku waramaya in Ergada ka qeybgalaysa shirka maamul u sameynta Gobolada Shabeelaha dhexe iyo Hiiraan in si weyn ay ugu doodayaan halka ay Noqonayso Caasimada maamul Goboleedka Shabeelaha dhexe iyo Hiiraan.
Qaar kamid ah Ergooyinka ka qeyb galaya shirka Magaalada Jowhar ayaa idaacadda simba ee Magaalada Muqdisho u sheegay in wali aan la isku raacin halka ay noqonayso Caasimada Maamulka Cusub ee Gobolada Shabeelaha dhexe iyo Hiiraan islamarkaana ay socoto dood kulul oo dhaxeysa Ergooyinka labada Gobol.
Ergooyinka kala ka socda Gobolada Hiiraan iyo Shabeelaha Dhexe ayaa Seddexdii maalin aynu soo dhaafnay ka doodayay Dastuurka uu yeelan doono Maamulka Cusub.
Qodobka 4aad ee cutubka 1aad ee qabya qoraalka dastuurka loo qeybiyay ergada ayaa waxaa ku qoran Magaalo madaxda iyo xarunta DGH&SHDH waxaana xubinta ugu horeysa ay ka codsanaysaa ergada inay soo buuxiyaan halka ay noqoneyso magaalada madaxda iyadoo qaabka loo qorayna uu yahay sidan;
1 Magaala Madaxda Dowlad Goboleedka DGH&SHDH waa…………….
Warar soo baxaya ayaa sheegaya in Ergooyinka ka kala socda Gobolada Hiiraan iyo Shabeelaha Dhexe in ay isku raaceen in Magaalada Jowhar ay noqoto Caasimada Maamulka Cusub.