Ciidamada Hay’ada Nabad sugida iyo sirdoonka qaranka dowlada soomaliya ayaa habeenkii xalay ahaa waxa ay howlgalo dad badan lagu soo qab-qabtay oo u badnaa dhalinyaro waxa ay ka sameeyeen Xaafada Coca Cola ee Degmada Yaaqshiid ee Magaalada Muqdisho.
Ciidamada Nabad sugida ayaa guryaha ku yaala degmada Yaaqshid waxa ay kasoo saareen dhalinyaro aad u fara badan iyagoo isugu geeyay hal meel. oo lagu kala saaray.
Afhayeenka Wasaarada Amniga Gudaha xukuumada soomaliya Mudane C/kaamil Macalin Shukri oo warbaahinta la hadlay ayaa sheegay in howlgalka guud ahaan lagu soo qabtay 400- oo qof kadibna la kala saaray.
Mudane C/kaamil Macalin Shukri ayaa Tilmaamay in ciidamada amniga ay si gooni u soo wateen 10-dhalinyaro oo lagu tuhmaayo in ay qeyb ka yihiin falalka dilalka iyo qaraxyada ka dhacay caasimada Muqdisho dhawaana lasoo bandhigi doono baaritaan kadib.
“Laamaha amniga waxa ay heleen xogag ku aadan in al-shabaab ay doonayaan in ay dhibateeyaan Ummadda Soomaaliyeed, marka si looga hortago, waan xoojineynaa howlgallada ka dhanka ah Al-Shabaab.”Ayuu hadalkiis sii raaciyay C/kaamil Macalin Shukri
Ciidamada Nabad Sugida ayaa joogteeyay maalmihii dambe howlgalada laga sameenayay qaar kamid ah degmooyinka Magaalada Muqdisho kadib markii caasimada ay ka dhaceen dilal loo geystay askar iyo mas’uuliyiin ka tirsan dowlada soomaliya.
