Cabdikariim Axmed Mooge wasiir ku xigeenkii hore ee Wasaarada qorsheynta Maamulka Somaliland ayaa waxaa uu sheegay in Passport kii Somaliland ay qiimo dileen wasiirada iyo masuulyiinta xilalka xukuumada ka haya kuwaas oo uu sheegay in Passport dalal shisheeyey oo ay heystaan ay ku safraan marka dalalka dibada ay u baxayaan halkii ay Passport ka Somaliland ay ugu bixi lahayeen.
“Madaxda Soomali-land ee maanta xilalka haya ayaa diidan in la hormariyo Passport kii Somaliland, qiimihii uu lahaa ayaga dilay, Somali-land waxaa mar walba ka go’an in ay sameysato Pasaport u gooni ah oo ka madax banaan kan Soomaliya,ragga maanta maamula Somali-land dibada waxay ugu safraan Pasaport kale oo dalal kale laga leeyahay”, ayuu yiri Cabdikariim Axmed Mooge.
Sidoo kale Cabdikariim Axmed Mooge wasiir ku xigeenkii hore ee wasaarada qorsheynta Maamulka Somaliland ayaa sheegay in Dowladda imaaraadka Carabta oo dhawaan la wareegtay Dekadda Magaalada Berbera ee Gobolka Saaxil in ay kasoo horjeedaan in Somali-land ay yeelato Passport u gooni ah.

