Madaxweynaha Dalka Turky-ga Recep Tayyip Erdogan, ayaa isbitaalka ku booqday dadkii shalay ku dhaawacmay weerarkii gaariga loo adeegsaday ee ka dhacay Bartamaha Magaalada Istanbul ee dalka Turky-ga.
Madaxweynaha oo dhaawacyada ku booqday qolalka ay kaga sugan yihiin isbitaalka, ayaa ka wareystay xaaladooda caafimaadeed, waxaana uu u rajeeyay in si deg deg ah kaga soo kacaan dhaawacyada ka soo gaaray qaraxa.
Booqashada kadib Madaxweynaha Dalka Turky-ga Recep Tayyip Erdogan, oo warbaahinta la hadlay ayaa sheegay In dowlada ay gacanta kusoo dhigi doonto kuwii ka dambeeyay qaraxii shalay ka dhacay Magaalada Istanbul ee dalka Turky-ga.
“Weerarkan argagaxiso waxaa lagula kacay kuwii ammaanka masuulka ka ahaa, tani maaha wax la cafin karo, qiilna malaha.” Ayuu yiri Madaxweyne Recep Tayyip Erdogan.
Dhanka kale Laamaha amaanka dalka Turky-ga ayaa sheegay in ay dad usoo qabteen qaraxii shalay ka dhacay Bartamaha Magaalada Istanbul ee dalka Turky-ga.
Wakaaladda Wararka Turkiga (Anadolu), ayaa qortay in laamaha ammaanku ay qaraxan u soo qabteen afar nin, oo looga shakisan yahay in ay wax ka ogaayeen qaraxaasi.







