Mas’uuliyiin ka Tirsan Dowlada Soomaliya ayaa maanta kormeer ku tagay Garoonka Kubada Cagta Muqdisho Stadium oo fariisan u ah Ciidamada Midowga Africa ee Amisom
Wasiirka Amniga Somaliya, Mudane C/risaaq Cumar Maxamed oo ay wehlinayeen Wasiirka Dhalinyarada iyo Ciyaaraha Xukuumada Soomaliya, Maxamed C/laahi Xasan, Xildhibaano iyo xubno ka tirsan Guddiga Ciyaaraha Gobolka Banaadir, ayaa ahaa mas’uuliyiintii maanta kormeerka ku tagay Garoonka.
Ugu Horeyntii Gudoomiyaha Ciyaaraha Gobolka Banaadir, Xasan Aadan Yabarow, ayaa sheegay in wax lagu farxo ay tahay in ay arkaan mas’uuliyiin ka tirsan Dowlada Soomaliya oo booqasho ku imaanaya Garoonka Muqdisho Stadium oo ah Garoonka ugu weyn soomaliya.
Maxamed C/laahi Xasan, (Nuux) Wasiirka Dhalinyarada & Ciyaaraha, Xukuumada soomaliya ayaa ganacsatada Somaliyeed ugu baaqay inay maalgashi ku sameeyaan Garoonka Stadium Muqdisho, oo ah garoonka ugu weyn soomaliya.
Ugu Dambeyntii Wasiirka Amniga Gudaha Xukuumada Somaliya, C/risaaq Cumar Maxamed ayaa sheegay in mudooyinka soo socda ay ciidamada amisom ka bixin doonaan xarunta Garoonka Muqdisho Stadium oo fariisin ay ka dhigteen kadib dagaaladii ka dhacay xaafadaas.



















