Wararka ka imaanaya deegaano katirsan gobalka shabeellaha hoose ayaa ku waramaya in halkaasi xalay uu ka dhacay dagaal u dhaxeeyay rag tirsan Al-shabaab iyo ciidamada xooga soomaaliya.
Dagaalkaan ayaa la sheegay inuu ka dhacay tuulada Aaybuuteey oo u dhaw deegaanka Mubaarak ee Gobolka Shabeellaha Hoose, halkaasi oo la sheegay iney fariisimo ku lahayeen askar katirsan Al-shabaab.
Sarkaal katirsan ciidamada xooga gobalka shabeellaha hoose ayaa Idaacada Simba ayaa u sheegay in dagaalkii ka dhacay duleedka degmada Afgooye, lagu soo qabtay sarkaal katirsan Al-shabaab oo lagu magacaabo sheikh abuukar oo aad looga garanayay tuulada Aaybuuteey ee duleedka degmada Afgooye.
Afayeenka koofur Galbeed Nuuradiin Abuukar Gacmo ayaa Radio Simba u xaqiijiyay qabashada sarkaalkaasi, waxuuna afayeenka intaa ku daray iney dib faah faahinta rasmiga soo saari doonaan.
Dhanka kale wali wax war ah kama soo bixin Al-shabaab, oo ku aadan sarkaalkaan la sheegay inuu iyaga katirsanaa, laguna soo qabtay dagaal ka dhacay duleedka degmada Afgooye ee gobalka shabeellaha hoose.

