Dowladda Federaalka Soomaaliya ayaa markii ugu horreysay si rasmi ah uga falcelisay warqaddii uu Isbaheysiga Golaha Mustaqbalka Soomaaliya u diray madaxda dalalka ciidamada ka jooga Soomaaliya, ka hor shirka Kampala ee looga arrinsanayo mustaqbalka Hawlgalka Taageerada iyo Xasilinta Midowga Afrika ee Soomaaliya (AUSSOM).
Wasiir Ku-xigeenka Wasaaradda Warfaafinta, Dhaqanka iyo Dalxiiska, Cabdiraxmaan Yuusuf Al-Cadaala, oo wareysi siiyay BBC-da isagoo ku sugan gobolka Mudug, ayaa ku tilmaamay warqadda mucaaradka mid “weerar ku ah qaranimada Soomaaliya”, isagoo sheegay in aysan ahayn tallaabadii ugu horreysay ee ay qaadaan.