Howlgalka Midowga Afrika ee Soomaaliya (AMISOM) ayaa sheegay Khamiistii in ay soo gabagabeeyeen tababar muddo afar maalmood ah u socday 160 sarkaal oo boolis ah oo dhowaan la keenay Soomaaliya si ay gacan uga geystaan kor u qaadista kaalintooda nabad ilaalinta ee dalka Soomaaliya.
Howlgalka Midowga Afrika wuxuu sheegay in saraakiisha booliiska ee ka socda Uganda ee joogi doona Soomaaliya muddo hal sano ah loo soo diray si ay gacan uga geystaan dhismaha awoodda lagama maarmaanka u ah ilaalinta sharciga iyo kala dambeynta.
Augustine Kailie, taliyaha booliska AMISOM ayaa ku sheegay bayaan uu ka soo saaray magaalada Muqdisho in tababarka loo furay cutubka 9aad ee booliska Uganda (FPU) uu sidoo kale u sahlayo saraakiisha inay fuliyaan waajibaadka AMISOM ee ah tababarada, la talinta, kormeerka iyo la talinta ciidamada booliska Soomaaliyeed.
Kailie ayaa ku booriyay saraakiisha cusub ee la keenay inay si daacadnimo ah u gutaan waajibaadkooda iyadoo la raacayo shuruucda iyo qawaaniinta lagu maamulayo howlgalka.
Wuxuu xasuusiyay saraakiishan inay Soomaaliya ujoogaan howlo nabad ilaalin ah wuxuuna kula dardaarmay inay ilaaliyaan xiriirka wanaagsan ee ay la leeyihiin bulshada martida loo yahay.
Sida laga soo xigtay AMISOM, sanadka 2021 waa sanad muhiim u ah Soomaaliya sababo la xiriira doorashooyin iyadoo soo dejinta saraakiishan ay kor u qaadi doonto tirada saraakiisha booliska ee heer federaal iyo heer gobol intaba.
Dowladaha Zambia, Uganda, Ghana, Kenya, Nigeria iyo Sierra Leone waa lixda waddan ee booliska ku deeqay Howlgalka Midowga Afrika ee Soomaaliya.
Booliska AMISOM ayaa hada Soomaaliya geeyay afar Unug oo Booliis ah oo la sameeyay (FPUs) oo ka kala socda Uganda, Nigeria, Sierra Leone iyo Ghana.
Booliska amisom waxay door muhiim ah ka ciyaaraan xaqiijinta amniga ee goobaha la xoreeyay iyadoo loo marayo roondooyin wadajir ah oo ay la sameynayaan Ciidanka Booliska Soomaaliyeed (SPF), iyagoo gacan ka geysanaya maareynta kala dambeynta bulshada.