Soomaaliya oo Ka Qeyb gashay Shirka aan Caadi ahayn ee Midowga Afrika+Sawirro

Shirkii Ururka Midowga Afrika ee aan Caaadiga ahayn ee ku saabsanaa siddii loo dhaqangelin lahaa Heshiiska Ganacsiga Xorta ah ee Afrika, ee la saxiixay sanadkii 2018, ayaa lagu soo gabagabeeyay magaalada Naimey ee dalka Niger.

Shirkan oo uu Wasiiru Dowlaha Arrimaha Dibadda iyo Iskaashiga Caalamiga ah Mudane Cabdulqaadir Axmed Cabdi ku matalayay Jamhuuriyadda Federaalka Soomaaliya ayaa waxaa kale oo looga hadlay arrimo badan oo ay wajahaysa qaaradda iyo sidii la isaga kaashan lahaa dhinacyada siyaasadda, diblomaasiyadda, ka hortagga tahriibka, colaadaha ka socda meelo kamid ah qaaradda iyo sidii loo hormarin ajendaha 2063.

Wasiirka oo khudbad ka jeediyay shirka ayaa caddeeyay kaalinta ay Soomaaliya ka qaadaneyso horumarka Afrika iyo sidii ay qayb uga noqon lahayd ganacsiga xorta ah iyo in la helo hab lagula tartamo dunida.

Wasiir Cabdulqaadir ayaa hoosta ka xarriiqay in Soomaaliya ay kamid tahay dalalkii aasaasay Ururka Midowga Afrika, muhiimad weynna ay u leedahay in la helo ganacsi xor ah oo ah mid fursado maalgashi u furaya ganacsatada Soomaaliyeed oo ku baahsan daafaha Qaaradda Afrika.

Wasiirka ayaa ka warbixiyay horumarka Soomaaliya ay gaartay sanadihii u dambeeyay ee dhinacyada dhaqaalaha, siyaasadda iyo nabadgelyada iyo in madaxbanaanida iyo midnimada Soomaaliya ay tahay mid lama taabtaan ah isaga oo ku boorriyay Madaxda Qaaradda in Soomaaliya ay ka fileyso in ay ixtiraamaan madaxbannaanideeda.

Wasiirka ayaa shir doceedyo la yeeshay Madaxda, Wasiirada Arrimaha Dibadda iyo wakiillada dalalka Masar, Itoobiya, Koonfur Afrika, Mauritania, Morooko, Liberia, Uganda, Nigeria, Gambia, Jabuuti, Seychelles, Equatorial Guinea iyo dalal kale.

Leave a Reply

Your email address will not be published. Required fields are marked *

*

This site uses Akismet to reduce spam. Learn how your comment data is processed.