Akhriso:-Baarlamaanka Soomaliya oo Ansixiyay Miisaaniyadda Sanadka 2018+Sawirro

Xildhibaanada baarlamaanka Federaalka Soomaliya ayaa maanta ansixiyay miisaaniyadda sanadka 2018-ka, kaddib markii kulan ay ku yeesheen magaaladda muqdisho.

Kulanka maanta waxaa shir gudoominayay Guddoomiye kuxigeenka 1aad C/wali Ibraahim Muudey ayaa waxaa soo xaadirtay 164 Xildhibaan.

Dood Xildhibaanada ka yeesheen Miisaaniyaddan oo dhowaan Guddiga Maaliyadda warbixin ka soo diyaariyay ayaa ugu dambeyn cod gacan taag loo qaaday.

Guddoomiye kuxigeenka 1aad ee Baarlamaanka C/wali Ibraahim Muudey ayaa ku dhawaaqay natiijada codka, waxaana uu xusay in 162 Mudane ay ogolaatay, waxaa ka aamusay hal Xildhibaan, halka hal Xildhibaan uu diiday.

Dhanka kale Wasiirka Maaliyadda Xukuumadda Federaalka Soomaliya C/raxmaan Ducaale Beyle oo markii la ansixiyay ka hadlay ayaa soo dhoweeyay ansixinta Miisaaniyadda, isagoo ku tilmaamay tallaabo wanaagsan.

Miisaaniyadda 2018 ee dowladda Federaalka Soomaaliya ayaa gaareysa lacag dhan $274,640,191 (labo boqol iyo toddobaadan iyo afar Milyan, lix boqol iyo afartan kun, boqol iyo sagaashan kow dollar).

Miisaaniyaddii hore ayaa ahayd 260 milyan, Farqiga u dhaxeeya labada miisaaniyadood ee 2017 iyo tan cusub ee 2018 ayaa ah 14 milyan oo micnaheedu yahay 5.63%

Leave a Reply

Your email address will not be published. Required fields are marked *

*